Voto por correo dende España

Ampliado o prazo do depósito do voto por correo ata o día 25 de maio, nos horarios habituais de apertura das oficinas de correos.

Nas eleccións do 28 de maio poderase votar por correo. O prazo de solicitude é desde o 4 de abril ao 18 de maio. Pode solicitalo:

  1. Na páxina web de correos, se ten un certificado electrónico.
  2. En calquera Oficina de Correos, solicitando o impreso para votar, ou descargándoo desde esta páxina. Unha vez cuberto, entregarase persoalmente en calquera Oficina de Correos, acreditando a súa identificación perante a persoa da oficina, que así llo requirirá para verificar a súa sinatura, presentando o seu DNI, pasaporte ou carné de conducir (xa que inclúen fotografía do titular e sinatura; en ningún caso fotocopia), “é posible que a identidade do votante estranxeiro sexa acreditada mediante a presentación dun documento oficial expedido polas autoridades españolas ou do Estado de orixe que inclúa a sinatura e a foto do elector e que acredita a súa identidade” (Acordo XEC 7/4/2011).

Lembre: o prazo para poder solicitar o voto por correo finaliza o vindeiro día 18 de maio Os servizos de Correos remiten a solicitude debidamente cuberta á Oficina do Censo Electoral, que fai a anotación correspondente nas listas do censo. Daquela, a persoa que solicita o voto por correo, unha vez foi admitida a súa solicitude, XA NON PODE VOTAR PERSOAMENTE.

A continuación a Oficina do Censo Electoral envía por correo certificado ao domicilio indicado no impreso de solicitude un sobre coa seguinte documentación:
-Unha papeleta de cada unha das formacións políticas que se presenten a cada un dos procesos convocados.

  • Un sobre ou sobres de votación.
  • O certificado de inscrición no censo.
  • Un sobre no que figurará o enderezo da Mesa onde lle correspondería votar.
  • Unha folla explicativa.

Esta documentación debe ser recibida pola persoa que o solicitou, previa acreditación da súa identidade. Se non estivese no seu domicilio, terá que ir persoalmente a recollela á Oficina de Correos correspondente.

Unha vez escollida a papeleta para cada proceso, introduciraa no sobre de votación correspondente (ou non incluirá papeleta se quere votar en branco) e pecharao.

Incluirá o sobre ou sobres de votación e o certificado de inscrición no censo no sobre dirixido á Mesa e remitirao por correo certificado en todo caso como moi tarde o 24 de maio. Este envío é gratuíto, xa que será o Ministerio do Interior a través do orzamento electoral o que se fará cargo de compensar o operador postal por estes envíos.

Correos entregará nas Mesas electorais a correspondencia que se poida recibir ata as vinte horas do día da votación. Os sobres recibidos despois das vinte horas serán remitidos á Xunta Electoral de Zona e destruiranse.

Como se mesturan os votos recibidos por correo cos que se depositaron persoalmente na urna?

O 28 de maio, ás 20 horas, despois de votar a última persoa na Mesa electoral, introduciranse na urna respectiva os sobres que conteñan as papeletas do voto remitidos por correo.

Para isto, séguense os seguintes pasos:

  • Abrir, de un en un, os sobres remitidos á Presidencia da Mesa e comprobar que conteñen o certificado de inscrición no censo e o sobre ou sobres do voto por correo.
  • Comprobar que está inscrito ou inscrita no censo da Mesa.
  • Introducir na urna correspondente o sobre ou sobres de votación.
  • Anotar o elector ou electora na listaxe numerada de votantes (os e as vogais realizan esta anotación).

Vídeo explicativo Voto por correo desde España